Temporaryo nga indi magbaton ang Corazon Locsin Montilebano Memorial Regional Hospital sang mga swab samples tubtob sa makareplenish na sang supply ang molecular laboratory sang ospital.
Sa interview sang Bombo Radyo kay Dr. Julius Drilon, Medical Center Chief sang CLMMRH, kun mahatag kuntani sang Philhealth ang nagakaigo nga reimbursement sa ospital, sarang ini nga magamit sa pagbakal sang reagents kaangay sang extraction kit kag test kits.
Pahayag sang doktor nga nagclaim na ang mga ini sang katapusan ang bulan sang Hulyo apang tubtob sa karon, wala pa sang nabatun.
Naghatag lang ang Philhealth ang P12 million apang gamay ini katama kun ikumparar sa sulukton nga P154 million.
Ang temporaryo nga pag-untat sang pagbatun sang swab sample ang tuga sang pagka-ubos sang extraction kit.
Kahapon ang ulihi nga adlaw sang pagbatun sang ospital sang swab samples.
Ang automated extraction kit ang nagapadasig sa paggwa sang resulta sang test.
Ini ang ginagamit nga pangkuha sang virus agud nga maproseso kag mabutang sa PCR machine.
May nabilin paman sa mga ini apang dyutay nalang kag ginatigana nalang sa mga personnel sang ospital hinali matapikan sang balatian.
Nagakabalaka si Drilon nga kun madamo ang malatnan sa mga personnel, madamo ang indi makatrabaho kag mas magalala ang siwasyon.
Tatlo ka adlaw naman nga temporaryo nga indi magbatun sang swab sample ang Regional Hospital tubtob sa adlaw sang Domingo kag magaserbe ini nga pahuway sang mga med tech.
Samtang kun indi gihapon mag-abot ang reimbursement sang Philhealth, mapilitan naman ang Regional Hospital nga balansehun ang nabilin nga pondo sa mga operasyon.
Magaresulta ini sa indi pagbatun sang regular surgical procedure kundi puro ang mga emerhensya lang ang pagabatunon. Samtang, Ginpasalamatan sang pinuno sang Corazon Locsin Montelibano Memorial Regional Hospital ang ginhimu nga resolusyon ni Bacolod City Councilor Ann Marie Palermo nga pwersahun ang National Inter-Agency Task Force sa paghingyo sa Philhealth nga ihatag na ang reimbursement sa ospital.
Suno kay Dr. Julius Drilon, indi lang CLMMRH ang ospital nga apektado kundi pati man ang mga district, provincial kag pribado nga mga ospital.
Suno kay Drilon, una naman ini nga naka-apelar sa City Council natuhoy sa isyu pinaagi kay Bacolod City Vice Mayor El Cid Familiaran bilang presiding officer, nga magpanindugan para mareimburse ang dapat nga budget sang mga ospital.
Dugang pa sini nga magalab-ot sa P1 billion ang kabug-usan nga alokasyon para sa mga ospital sa bug-os nga Negros Occidental.
Pahayag man sini nga indi lang COVID ang gina-atinder nga pasyente sang mga ospital nga nagakinahanglan sang finacial expenses kundi yara man man ang mga NON-COVID nga mga pasyente.
Kun mareimburse, may inugbakal na sang supply, bulong, kag mga operating expenses ang mga ospital.
Dugang man ini nga makabulig sa pagpangsweldo sang mga pribado nga ospital sa probinsya, ilabi na sa karun nga halos wala na ang mga ini sang pangsweldo sa mga staff partikular na sang mga nurse.
Naga-apelar si Drilon indi lang para sa kaayuhan sang Regional Hospital kundi para man sa iban pa nga institusyon nga apektado sang manubo nga pagpagwa sang bulig sang Philhealth.
Bilang pinuno sang COVID chair response sa Bacolod, nagpatigayon sang survey si Drilon sa anum pa ka mga ospital.
Santo sa survey, palarehas nga problema sang mga ini amo ang kakulang sang mga PPE nga magamit proteksyon sang mga medical personnel tuga sang kakulang sa pondo, kag indi naman makahire sang mga personnel nga maga-atipan sang mga yara sa COVID areas.
