Nagpaathag ang medical center chief sang Corazon Locsin Montelibano Memorial Hospital angot sa bag-o nga polisa nga ginadumilian ang pagsulod sang nagabantay sa mga pasyente sa balay-bululngan.
Suno kay Dr. Julius Drilon, ang indi pagpasugot sa mga bantay nga makasulod sa ospital ang precautionary measures bangud nagadata na ang community transmission sang coronavirus disease 2019.
Apisar pa nga may mga health clearance sila nga ginapresentar kag requirement man sang ospital sa mga nagabantay sa mga pasyente, wala sila nagahatag sang kompiyansa bangud wala sila nakahibalo kun sa diin pa ang mga ini naghalin antes magpadulong sa ospital, may nakita man nga inacccurate ang mga health card, kag madamo ang nagabinutig.
Indi man sini luyag nga macontaminate ang mga bantay sa ospital kag kasubong man ang health care workers bangud naagyan na sang ospital nga naquarantine ang mga doctor kag nurses bangud natapikan sang balatian.
Ginpasiguro man ni Drilon nga mabantayan kag maatipan ang mga pasyente.
May mga pediatrics man sila nga gindesignar agud mag-atipan sa mga pedia.
Ginpahayag man sini nga kun wala naluyagan sang mga nagabantay sa mga pasyente sang ospital ang ginapatuman sang CLMMRH, indi lang nila pag-iadmit sa regional hospital ang ila pasyente.
Suno kay Drilon, tuman ka dako ang risgo nga magpadayon sa pagpasulod sa kapin 200 ka mga bantay bangud may nakaadmit nga 200 ka mga pasyente sa non-covid section sang ospital.
Indi man sini luyag nga makadugang pa sa ginhalinan sang community transmission ang mga nagabantay kag indi man sini luyag nga liwat isakprisyo ang mga healthcare workers sang ospital.
