Ginkalipay sang kampo ni Bacolod City mayoral aspirant Albee Benitez ang desisyon sang korte nga pagbasura sa petisyon batok sa iya nga kakason ini sa listahan sang mga registered voters sa syudad bangud sa pagkwestyon sang residency sini.
Una diri, ginbasura sang Regional Trial Court Branch 44 sa syudad sang Bacolod ang petisyon nga kakason ang pangalan ni anay Negros Occidental 3rd District Representative Albee Benitez sa listahan sang mga registered voters.
Santo sa desisyon ni Judge Ana Celeste Bernad nga napetsahan Pebrero 7 tuig 2022, ginpabakod sini ang desisyon sang Municipal Circuit Trial Court in Cities Branch 4 sang Oktubre 1 tuig 2021 nga si Benitez ang residente sang Barangay Mandalagan.
Sa interview sang Bombo Radyo Bacolod kay Atty. Andrei Saril, legal counsel ni Benitez, nabaton nila ang kopya sang desisyon sang korte kahapon sang aga.
Suno kay Saril, ginpahayag sang korte nga wala sang basehan ang petisyon nga ginfile sang tatlo ka mga tagreklamo nga sanday Hector Yula, Teodoro Abao, kag Jonah Torneo Abao.
Suno pa diri, matapos ang desisyon sang MTCC ginpasaka pa sang mga tagreklamo ang appeal sa Regional Trial Court kag santo sa desisyon sang nasambit nga korte, wala sang merito ang appeal kag gin-affirm ang desisyon sang MTCC.
Santo sa desisyon sang korte, ang residency sang kandidato ang navalidate na sang korte.
Ginkalipay man sang kampo ni Benitez nga ang korte ang isa sa nagpamatuod nga residente sang syudad sang Bacolod kag nakahanda ini nga magserbe sa mga tawo sa syudad.
