Ginpahayag sang provincial election supervisor sang Negros Occidental nga may yara sang pagnubo sa registered voters sa probinsya subong nga tuig kun ipaanggid sa mga nagparehistro sang tinalikdan nga mga tinuig.
Sa data sang Commission on Elections-Negros Occidental, nagdangat sa 2,009,564 ang registered voters para sa palaabuton nga Midterm Elections sa 2025 sa kabug-usan nga probinsya kalakip na ang Bacolod City.
Ang registrants ang nagikan sa 662 barangays sa probinsya sang Negros Occidental.
Nagdangat sa 747 voting centers ang nahamtang sa Negros Occidental kalakip na ang ciudad sang Bacolod samtang naestablisyar nga voting precincts ang nagdangat sa 13,004 kag ang numbered precincts clustered ang nagdangat sa 2484.
Santo sa rekord sang ahensya (COMELEC) nga sa anom ka mga distrito sa probinsya ang Third District ang may pinakamataas nga numero sang bontante nga may 318,496; ginasundan sang Sixth District nga may 311,292; Fifth District ang may 302,714; First District ang may 258,527; Fourth District ang may 248,782; kag 212,939 registered voters sa Second District.
Mas madamo naman ang mga babayi nga registered voters kun sa diin nagdangat sa 1,025,698 samtang ang mga lalaki ang nagdangat lamang sa 983,866.
Ang nagapanguna nga Local Government Unit nga may pinakamataas nga registered voters amo ang ciudad sang Kabankalan nga may yara sang registered voters nga 110,775, nagapangaduha ang Bago City nga may 103,683, ginsundan sang Cadiz City nga may 93,597 kag ang nagapang-apat ang ciudad sang Silay nga may 90,316 registered voters.
Samtang ang may pinadiutay nga registered voters ang nagikan sa banwa sang Candoni nga may yara lamang sang 16,580 registered voters.
Suno kay Ananoria, pila sa mga ini ang napaslawan nga magboto sang duha na ka election ukon ang iban ang nagsaylo na sang registration sa gwa sang probinsya.
Madumduman sang tinalikdan nga Barangay kag Sangguniang Kabataan Elections (BSKE) 2023 yara sa 2,014,725 ang nagparehistro nga botante, magluwas sa mga SK voters.
