Gin-athag ni Philippine Statistics Authority-Negros Occidental head Luis Gonzales nga indi ma-supersede ukon mabayluhan sang national identification card ang iban nga mga IDs sang iban nga mga government agencies.
Madumduman nga ginpirmahan ni Presidente Rodrigo Duterte ang Philippine Identification System Act bilang isa ka layi sadtong Agosto 2018 nga nagatuyo nga makahimo sang isa ka official ID card para sa tanan nga mga Pilipino nga naga-integrate kag naga-interconnect sang nagkalain-lain nga mga government issued IDs.
Sa interview sang Bombo Radyo Bacolod kay Gonzales, ginpahayag sini nga separado nga ID ang national ID card kag indi ini replacement sang iban nga mga IDs kaangay na lamang sang UMID ukon driver’s license kag iban pa.
Apang ang pinasahi lang sa national ID suno kay Gonzales nga pwede na maka-transact ang bisan sin-o lang nga nakarehistro diri sa tanan nga mga government ukon private offices.
Nahibaluan nga masami karon nga nagapangita ang pila ka mga ahensya ukon opisina sang duha ka valid IDs kun magtransak ka.
Nahibaluan nga kahapon, nagsugod na ang pre-registration sa mga identified low-income families sa pungsod para sa national ID system.
