Naghagan-hagan na ang reklamo sa kulang nga supply sang tubig sa ciudad sang Bacolod nga sa karun nagbalik na sa 81 million liters per day (MLD).
Suno kay Bacolod City Mayor Alfredo ‘Albee’ Benitez, nakabulig ang pag-inulan sang tinalikdan nga mga inadlaw para madugangan ang supply sang tubig.
Suno diri, sang tinalikdan nga bulan nagnubo sa 77 MLD ang narekord nga supply sang tubig kag bangod sini may yara sang gindugang nga 4 MLD nga nalab-ot na sa karun ang 81 MLD.
Suno sa alkalde, kun maayo ang status sang Matab-ang river, ginalauman nga makadugang ini sa water supply nga 3 MLD agud malab-ot ang 84 MLD nga target sang ciudad.
Dugang pa sini, kun mag-abot ang tiyempo sang tig-ululan ginalauman nga magasaka tubtob sa 90 MLD ang supply sa ciudad.
Samtang, 53 MLD naman halin sa 81 MLD nga supply sang tubig ang naggikan sa deepwell apang suno kay Benitez, dapat nga ireserba ang tubig sa deepwell agud sa tion nga may kakulangan sang supply may yara pa sang mahimo kuhaan nga santo sa Water Security Plan.
