Ginakabig sang provincial veterinarian sang Negros Occidental nga welcome development ang pagrekomendar na sang Department of Agriculture sa Office of the President nga magdeklarar sang state of national emergency bangud sa halit sang African swine fever.
Kahapon, ginpasa na sang Department of Agriculture (DA) kay President Rodrigo Duterte ang ila nga rekomendasyon nga ideklarar ang national state of emergency agud nga ma-address ang pagpamahog sang ASF nga nagtuga sang pagnubo sang populasyon sang baboy, nagnubo nga supply sang pork products kag pagmahak sang presyo sa merkado.
Sa memorandum nga ginpirmahan ni Dar kag ginsumiter sa presidente pinaagi kay Executive Secretary Salvador Medialdea, gindraft sang DA ang proklamasyon nga pagdeklarar sang State of National Emergency agud nga mapunggan ang padayun pa nga paglapta sang ASF pinaagi sa pag-implementar sang biosecurity measures agud nga masuguran ang rehabilitasyon sang swine industry kasubong man ang pag-alukar sang pondo para diri.
Sa memo, ginpahayag sang Agriculture chief nga tuman na ang pagnubo sang lokal nga industriya sang baboy.
Suno kay Dar, naglapta na ang balatian sa 12 ka rehiyon, 40 ka probinsya, 466 ka mga ciudad kag munisipalidad kag 2,425 nga mga Barangay sa Pilipinas.
Masobra sa tatlo ka milyon naman ka mga baboy ang napatay bangod sa balatian nga nagtuga sa pagnubo sang pork supply kag gulpyada nga pagsaka sang presyo sang basic agricultural commodities.
Sa interview sang Bombo Radyo kay Dr. Renante Decena, kinhanglan ang deklarasyon sang state of emergency agud mangin mas mahapos ang paggamit sang calamity fund nga wala na sang restriksyon.
Suno kay Decena, kuntani magagikan sa executive department ang pagdeklarar sang state of emergency kag indi nga Senado ang manawagan nga ipagwa ang deklarasyon.
