Ginkumpirmar sang Department of Social Welfare and Development (DSWD) nga nagsugod na ang pagpanagtag sang social pension para sa mga senior citizens nga wala sang anuman nga pension nga ginabaton.
Sa interview sang Bombo Radyo kay Chiqui Gonzales, project development officer sang DSWD, napulo na ka mga banwa kag ciudad sa Negros Occidental ang ila nabisitahan para sa pay-out sang social pension.
Ini ang ginalakipan sang Manapla, Silay, Talisay, San Carlos, Salvador Benedicto, Valladolid, San Enrique, Hinigaran kag Sagay.
Bwas nga adlaw, magabisita ang DSWD sa ciudad sang Cadiz para sa pay-out.
Nahibaluan nga sa daan nga sistema, ginadownload sa LGU ang budget apang subong, ang DSWD na mismo ang nagatagtag sang kwarta direkta sa mga pensioners.
Sa panugod sang tuig 2019, nagpatigayon ang ahensya sang validation sa mga pensioners agud masiguro nga ang nagakadapat gid man nga benepisyaryo ang magabaton sang social pension kag natapos ini sang bulan sang Hunyo.
Suno kay Gonzales, 49 826 ang target nga mangin benepisyaryo sa Negros Occidental kag masobra 46 mil pa lang ang yara sa generated list.
Sa karon, padayon pa ang pagsulod sang pangalan sang iban nga social pensioners sa listahan.
Ang 500 pesos kada bulan nga social pension ang gintingob hatag sang DSWD gani seis mil pesos ang ginabaton sang tagsa ka pensioner.
Nagpanugyan naman si Gonzales sa mga benepisyaryo nga halungan ang kwarta agud mabakal ang mga kinahanglanon.
