Nagakaigo ang preparasyon sang Bacolod City Police Office kag Negros Occidental Police Provincial Office sa pag-abot sang Pilgrim Relics ni Sante Teresita del Nino Hesus kaina sang udto tubtob Marso 2.
Sa interview sang Bombo Radyo kay Police Lieutenant Colonel Noel Polines Chief of Operations sang Bacolod City Police Office, Ila ginpreparahan ang pag-abot sang Pilgrim Relics nga may yara sila sang gintalana nga convoy security, duha ka marshal nga maga-upod samtang yara sa area of responsibility sang Bacolod City ang Pilgrim Relics, kag Special Weapon And Tactics (SWAT) team nga yara man kun magpadulong ini sa mga simbahan sa siyudad.
Kasubong man nga sa tagsa nga mga simbahan nga bisitahan sang Pilgrim Relics, may yara sang security kag police assistance desk.
Ginpasalamatan man sini ang simbahan, kapulisan kag NOCPPO sa suporta nga matigayon ang matawhay nga pag-abot sang pilgrim relics ni Santa Teresita.
Ginlauman naman ni Polines ang pagdagsa sang mga tumuluo, gani nangabay ini sa mga tumluo nga sundon ang layi sang simbahan kag mag intindihanay kag indi magdinaguso.
Samtang, mainit nga gin-abibi ang pag-abot sang relics ni St Therese of Child Jesus sa San Sebastian Cathedral kaina sang aga.
Ginpangunahan ni Bishop Patricio Buzon ang welcome rites sa pag-abot sang relics ni St Therese of Child Jesus.
Madamo sang mga tumuluo ang nagsugata diri kun sa diin may mga dala sang rosas kag mga panyo.
Kaina alas 4:30 ang takna sang hapon may yara sang patigayunon nga misa sa San Sebastian Cathedral.
Pagkatapos sang misa gindala naman ini sa Carmelite Monastery, Lacson St. Mandalagan, Bacolod City kun sa diin magapatigayon man sang misa kag mapalipas sang gab-i ang relics ni St Therese of Child Jesus.
Bwas kag sa madason nga adlaw ini ang magapadulong naman sa syudad sang Talisay, Silay, sa Our Lady of Victory Parish sa syudad sang Victorias kag natalana naman ini nga pagadal-on sa syudad sang San Carlos.
Ini na ang ang ika lima ka beses nga pagbisita sang relics St Therese of Child Jesus sa Pilipinas.
