Ginaseguro sang alkalde sang banwa sang La Castellana nga patas ang mapanghatag nga mga relief goods sa mga evacuees sang paglupok sang Bulkan Kanlaon.
Ini ang kasunod sang mga nagalagaw nga balita nga may nga donasyon nga wala nagalab-ot sa mga evacuees.
Sa interview sang Bombo Radyo Bacolod kay La Castellana Mayor Rhummyla Nicor Mangilimutan, kung bastante ang donasyon nga nabatun sa numero sang mga evacuees, ini ang ginapahanugutan na lamang nga derekta nga mahatag, kag ginapaupdan na lamang sang opisyales sang banwa.
Apang kun kulang ang donasyon sa numero sang evacuees, ini ang ginapahigad anay tubtob sa makatipon sang kaangay nga kadamuon antes ipanagtag.
Ini agud malikawan ang pagkumparar sang mga evacuees sa ila mabatun nga bulig gikan sa nagkalainlain nga evacuation centers.
Nagapasalamat man ang alkalde sa tanan nga mga nagbulig mapagamay man ukon dako.
Amiando ini nga kulang ang P4.8 million nga 30 porsyento sang ila quick response fund, kag ini ang halos hustuhan lamang sa gatong sang mga salakyan nga nagabalik-balik sa pagdul-ong sang bulig kasubong man sa evacuation efforts.
Gikan sa anay tatlo ka evacuation centers, ini ang nadugangan kadungan sa pagdugang man sang mga evacuees matapos ang natabo nga mga lahar flows.
Sa karun nagadangat na sa isa ka libo nga pamilya ukon apat ka libo nga indibidwal ang yara sa evacuation centers, apang nagapanawagan gihapon ang alkalde sa mga yara sa apektado nga lugar nga wala pa nag-evacuate, nga magpanaog naman agud mas mapahapos ang paghatag sang bulig.
