Ginmando sang World Boxing Organization (WBO) ang gilayon nga rematch sa tunga sang Filipino star nga si Charly Suarez kag sang junior lightweight titleholder nga si Emanuel Navarrete.
Ini matapos nga ginpamatukan sang California State Athletic Commission (CSAC) ang desisyon sa kontrobersyal nga kadalag-an sang Mexican champion.
Nagdaog si Navarrete pinaagi sa eighth-round technical unanimous decision batok kay Suarez sang nagligad nga Mayo 10 matapos nga gindeklarar sang ringside physician nga indi na sia mahimo nga makapadayon sa paghampang bangud sang pilas sa iya wala nga mata.
Ginpagwa sang referee nga ang gisi ang gintuga sang aksidente nga headbutt. Apang kun basehan ang replay, ini ang bangud sang matinlo nga sumbag sang Pinoy.
Unanimous ang nangin boto sang CSAC nga i-overturn ang kadalag-an ni Navarrete sa isa ka “no contest.”
