Napasakaan na sang kaso ang step father ni Pearl Joy Galve nga namissing sang Hulyo 29 apang nasapwan nga wala na sang kabuhi sa sulod sang kampo sang tubo sa Hda. San Roque, Barangay Cubay, La Carlota City, Negros Occidental.
Madumduman nga ang 15 anyos nga dalagita, ang namissing sang Hulyo 29, opening of classes, kun sa diin sang aga lang ini nakasulod sa klase apang wala na nagsulod sang hapon, kag bag na lamang sini ang nabilin sa eskwelahan.
Sa interview sang Bombo Radyo Bacolod kay William De Arca, Executive Officer sang National Bureau of Investigation-Bacolod, nagpadulong sa NBI ang iloy ni Pearl Joy nga si Jenifer agud nga magpasaka sang kaso batok kay Rene John Nasis ang stepfather sang dalagita.
Suno kay De Arca, priority nila nga ipasaka nga kaso ang murder apang bangud nakita sa imbestigasyon nga may yara sang natabo nga pagpanghimulos, kaso nga rape in relation to RA 7610 bangud minor pa ang biktima.
Suno diri, ginpahayag man sang iloy ni Pearl Joy nga nakapanugid na ang dalagita nga gina-abusuhan ini sang iya stepfather sadto apang bangud sa kahadlok wala na ini ginpalab-ot sa mga otoridad.
Nakadepende pa sa assessment sang fiscal office ang ginpasaka nga kaso batok kay Nasis kag ang pagdagdag sang warrant of arrest.
Ginpahayag man ni De Arca nga wala sila nakahibalo sa whereabouts ni Nasis apang ang ulihi nila nga impormasyon nga nagpahayag si Nasis nga sa utod niya sa Barangay Handumanan siya magatinir.
Nagpanawagan man ini sa tanan nga may yara sang impormasyon nga makabulig sa pagresolba sang kaso ipadangat lang sa mga otoridad agud nga mahatagan sang hustisya ang kamatayon sang biktima.
