Ginkumpirmar sang pinuno sang Corazon Locsin Montelibano Memorial Regional Hospital nga nagsugod na ang pag-renovate sa isa nila ka building nga pagahimuon bilang biosafety laboratory testing center for COVID-19.
Sa interview sang Bombo Radyo Bacolod kay Dr. Julius Drilon, chief of hospital sang CLMMRH, ginpahayag sini nga natapos na nila ang floor plan sang nasambit nga bio lab kag halos aprubado na sang Department of Health.
Nagapangayo si Drilon sang diutay nga pag-intindi sa delay sang pagsugod sang operasyon sang testing lab bangud ginalauman nga sa tunga-tunga sang bulan sang Mayo pa maga-abot ang mga materyales kag machines nagikan sa Manila.
Suno diri, indi ordinaryo nga lugar lang ang ila nga ginahimo bangud madamo ini sang requirements nga dapat icomply kag nagakaigo sa standard sang Department of Health.
Nahibaluan nga ang Silver Dragon ang contractor sang nasambit nga renovation kag ang city government ang nagpatigayon sang bidding.
Nagabalor sang P12.3 million ang construction kag renovation sang building kag P4.6 million naman ang para sa supply sang bio lab nga lunsay nagikan sa ginpa-in nga P20 million nga pondo sang ciudad.
Nagpagwa man ang CLMMRH sang P15 million para sa mga medical equipment.
Nagalaom si Drilon nga mahuman na ini sa mas madali nga panahon agud makasugod na ang Bacolod City sa pagtest sang mga swab samples.
