Bilang pagkilala sa exemplary public service kag outstanding performance sa panggobyerno, gin-anunsyar ni Bacolod City Lone District Representative Alfredo “Albee” Benitez nga siya ang magahatag sang personal nga P1 million cash incentives sa mga makabatun sang barangay governance kag excellence awards subong nga 2026 gikan sa Department of the Interior and Local Government (DILG) kag Bacolod City Government.
Ang cash incentives nga gikan mismo sa personal funds ni Benitez kag indi gikan sa kaban sang gobyerno, ang kabahin sa iya padayun nga adbokasiya sa pagpromote sang good governance, transparency, accountability, kag excellence in public service, partikular na sa Barangay level.
Target sang inisyatibo nga kilalahon kag mahatagan sang reward ang mga barangay kag local officials nga makapakita sang indi matawaran nga dedikasyon sa pagserbe sa ila constituents kag sa pag-implementar sang mga programa nga derekta nga makahatag benepisyo sa komunidad.
Ini na ang ikatatlo nga tuig sang paghatag sang kongresista sang cash prizes sa tanan nga winners.
Ang mga benepisyaryo sang P1 million incentive program ang ginalakipan sang awardees sa 2026 Seal of Good Local Governance for Barangays (SGLGB), 2026 Best Performing Barangays, Barangay Secretaries’ Service Excellence Award, Barangay Treasurers’ Service Excellence Award, kag mga Barangay nga makilala sa Financial Administration and Sustainability, Disaster Preparedness, Safety, Peace and Order, Social Protection and Sensitivity, Business-Friendliness and Competitiveness, Environmental Management, kag Local Government Support Fund Implementation.
Malakip sa mahatagan sang incentives ang magadaog sa 2026 Legislative Excellence in Governance and Empowerment for National Development Awards, lakip ang Champion, First Runner-Up, kag Second Runner-Up; kasubong man ang 2026 Most Outstanding Barangay Secretary kag Most Outstanding Barangay Treasurer; kag ang tagsa nga makabatun sang 2026 Simbolo ng Inisyatibo at Galing (SINAG) Awards.
Pahanumdom ni Benitez nga ang inisyatibo ang indi lamang para sa paghatag sang financial rewards kundi, para sa paghuman sang culture of excellence kag healthy competition sa 61 ka Barangay sa Bacolod City.
Nagalaom ini nga paagi sa pagkilala sa outstanding performances, ini ang magaduso pa sa mga Barangay nga pasanyugon ang ila panggobyerno, ma-imprubar ang pagserbisyo, kag magapatuman sang innovative programs nga nagasabat sa mga panginahanglanon sang komunidad.
