Gin-athag sang kongresista sa 5th District sang Negros Occidental nga may patigayunon pa nga bicameral conference antes maglab-ot sa opisina sang presidente ang hagna nga nagaduso sang 5-year term para sa opisyal sang Barangay kag Sangguniang Kabataan.
Sa interview sang Bombo Radyo Bacolod kay Representative Atty. Dino Yulo, kinahanglan pa ang Bicam bangud sa version sang Senado duha lamang ka termino apang lima ka tuig sa tagsa ka termino samtang sa Senado 3 terms naman.
Sa Bicam desisyunan kun sa diin nga version ang sundon.
Suno kay Yulo, duha lamang ka termino ang ginduso sa kongreso bangud nagapati ini nga nagakaigo na ang napulo ka tuig agud nga mapamatud-an sang mga Barangay officials ang ila nga kaugalingon sa ila ikasarang sa pagserbisyo sa mga pumuluyo.
Samtang sa pihak nga bahin, gin-athag man sini nga indi siya affiliated sa UNEGA kag LOVE Negros, ang duha ka local political party sa Negros Occidental.
