Gintindugan ni Iloilo 3rd District Representative Dr Janette Garin nga dapat unahon ang pagbulig sa mga biktima sang kalamidad sangsa ipadayun ang Barangay and Sangguniang Kabataan Elections subong nga tuig.
Sa interview sang Bombo Radyo Bacolod kay Garin, P13 billion ang direct cost sang eleksyon kag P4 billion pa lamang ang nagasto.
Gani mas luyag nila nga ang nabilin nga P9 billion ang gamiton na lamang para sa panginahanglanon sang mga pumuluyo nga apektado sang kalamidad, partikular na sa social services.
Dugang pa sini nga madamo sang nagapanawagan nga i-abolish ang Sangguniang Kabataan.
Ini bangod ang ila nga edad ang wala nagasanto sa nagakaigo nga edad sa pagpamuno, kag sila ang mas nagakadapat nga magtutok sa pagtuon.
Paagi sa postponement sang Brgy and SK Elections, mahatagan pa sang tion ang mga mamalidha nga matun-an kun kinahanglan nagid man nga i-abolish ang SK.
Ini ang ila nga pagatalakayun sa Kamara, kag ginalantaw sini nga makapagwa na sang desisyon sa early September para sa postponement sang Brgy and SK Elections.
Suno kay Garin, nahangpan nila ang reklamo sang iban nga nagaoanawagan na sang eleksyon bangod sa indi maayo nga pagpamuno sa Barangay, apang pahanumdom sini nga may mga opisyal man nga maayo ang performance.
Pahayag pa sini nga sa mga nagakatabo nga gyera sa luwas, sa pagsaka sang presyo sang gatong, kag iban pa nga epekto sa ekonomiya, mahimo nga madamo sang negosyo nga magasarado.
Ini ang magaresulta man sa pagnubo sang tax collection, gani dapat gamiton ang pondo sang gobyerno sang husto.
Dugang pa ni Garin nga tuman ka gastos sa gobyerno ang sunod-sunod nga eleksyon, apang kun sa parehas nga tuig lamang tingubon ang Brgy and SK Elections kag National Elections, mahimo nga mapanubo ang kinahanglan nga pondo bangod magapatigayon nalang sang gamay nga adjustments.
