Naglapaw na sa deadline ang pagconstruct sa Bacolod Central Market kun sa diin may nabilin pa nga 10 porsyento nga wala pa natapos.
Ang contractor sa proyekto amo ang Silver Dragon nga may paga-atubnagon nga penalidad bangod nga wala ini nakalaot sa deadline.
Suno kay Atty. Romeo Cralos Ting Jr, city legal officer sang Bacolod, problema sa gihapon sa contractor amo nga nadelay ang construction sang Central Market bisan Disyembre tuig 2022 pa kuntani ang completion date sini.
Suno diri, nahuman na ang 90 porsyento apang ang 10 porsyento nga nabilin amo ang mid-section sa merkado nga ginalakipan sang meat section kag fish section, gani indi sa gihapon makasaylo sa sulod ang mga vendors.
Subong nga adlaw, nagplastar na ang iban nga mga manugbaligya sa sulod sang Burgos Public Market.
Suno kay Ting, nangin matawhay ang ila ginpatigayon nga raffle para sa mga vegetable vendors nga maka-avail sang pwesto sa sulod sang merkado.
Pahayag ni Ting, wala sang gamo sa raffle bangod nga supesyente ang stall nga maka-akomodar sa mga vendors.
Kun matapos na ang construction, pagahawanan ang gwa nga bahin sang merkado kag ipasulod ang tanan nga mga manugbaligya.
Sa Libertad Public Market, padayon sa gihapon ang mapping sa mga vendors kun sin-o ang madugay na nagabaligya didto kag tumandok sang siyudad.
Suno kay Ting, kun pagabasehan lang ang asosasyon madamo sang miyembro nga wala nagabaligya sa merkado.
Pagatsekyaron man sini ang ginapangayo sang mga vendors nga pwesto sa gwa sang annex building nga luyag nila igive up ang ila pwesto sa sulod kag sa gwa nalang magbaligya.
