Magapatigayon sang meeting ang pila ka mga ahensya kag opisina sang gobyerno sa ciudad sang Bacolod, agud solusyonan ang report tuhoy sa pagduging sang mga badjao kag pang-abusar kun sila ang indi mahatagan.
Sa interview sang Bombo Radyo Bacolod kay Bacolod City Administrator Atty Mark Steven Mayo, kagab-i nagmando na si Bacolod City Mayor Greg Gasataya nga magpatawag gilayon sang meeting kag pasanyugon ang kampanya batok sa mendicants.
Aminado si Mayo nga alarming ang reports tuhoy sa mga abusador nga badjao nga kun indi mahatagan, iban ang nagapanupla kag may-ara man sang nagapamahog gamit ang kutsilyo ukon gunting.
Ang mga ini ang kalabanan makita nga hinali nga nagasaka sa pampubliko nga jeep kag nagapangduhol sang sobre ukon hinali nalang nga nagahumlad sang mga palad.
Apisar nga wala pa sang nareport nga ginpatup-an ang mga gapamahog gamit ang patalom, ini ang nagatuga sang kakulba sa publiko.
Suno kay Mayo, may-ara na sang anti-mendicancy task force ang ciudad nga amo man ang nag-operar sang nakaligad sang mga rugby boys sa 4th-Lacson Street.
Kaupod sa magasapol ang pinuno sang Department Social Services and Development (DSSD), Director sang Bacolod City Police Office, Councilor Israel Salanga nga chairperson sa Committee on Social Services sa Sanguniang Panlungsod, City Administrators Office kag tanan nga miyembro sang Anti-Mendicancy Task Force.
Tun-an nila kun sa diin masami ang operasyon sang mga badjao kag mangita sang mahimo nga solusyon.
Karun nga Masskara season, luyag sang alkalde nga mangin masadya ang tanan, kag indi pwede nga malakutan sang kahadlok.
