Ginpa-athag sang abogado sa ciudad sang Bacolod kun ano Republic Act No. 9344 ukon Juvenile Justice and Welfare Act of 2006 kasunod sa nagluntad nga shooting incident sa sulod sang isa ka buluthuan sa Tacloban city kun sa diin duha ka menor de edad ang suspek.
Kahapon, nagpaniro sa sulod sang San Jose National High School ang mga suspek nga lalaki nga nagda-edad sang 15 kag 14.
Apat ang kumpirmado nga napatay samtang masobra sa 20 ang narekord nga pilason.
Sa interview sang Bombo Radyo kay former councilor Atty Renecito Novero, sa idalom sang RA 9344 ang tawo nga nakahimo sang krimen nga naga -edad sang 15 papanaog, exempted sa criminal liability.
Suno diri, sadto 12 years old ang edad nga nabutang sa layi apang ginpasaka ini sa 15.
Suno kay Novero, indi mapreso ang Child in Conflict with the Law (CICL) apang igakustodiya ini sang Department of Social Welfare and Development kag didto tudloan ang bata nga matadlong ang iya banas.
Bangod exempted sa liability ang bata, ang ginikanan sini ang manabat apang indi criminal liabilities kundi mahimo nga mabayad ang ginikanan sang danyos.
Dugang pa sini, indi matawag nga preso ang CICL sa DSWD apang kaangay nga preso sila sa gihapon bangod indi libre ang ila paghulag.
Pahayag sang abogado, dapat mapa-intindi ang CICL nga indi pwede nga maghimo sang sala nga wala sang konsekwensya.
Samtang, ginpa-athag man sini ang bentaha kag disbentaha sa RA 9344 kun sa diin iban nga mga CICL nga napaidalom sa rehabilitasyon natudloan sang insakto kag nangin maayo apang ang disbentaha naman diri amo nga kun kaisa ginagamit ang kabataan para maghimo sang indi maayo sa rason nga indi man sila mapreso.
