Gin-aprubahan na sang korte ang request sang Bacolod City Police Station 1 nga ma-access ang social media account ni Freya Mae Go.
Madumduman nga nasapwan ang bangkay ni Freya sa kahilamunan sa bahin sang Barangay 12, Bacolod City sang Oktubre 22.
Sa interview sang Bombo Radyo Bacolod kay Police Capt Francis Depasucat, station commander sang Bacolod Police Station 1, nag-request sila sa korte sang warrant to disclose data kag ini ang naaprubahan man.
Ini agud nga madisclose ang data gikan sa cellphone kag social media account sang biktima nga mahimo makabulig sa imbestigasyon kag pagsolbar sang kaso.
Suno kay Depasucat tubtob sa karun wala sang witness sa krimen.
Ang nasambit nga warrant ang ipasa sa meta agud nga mahatag sa mga kapulisan ang kopya sang data ukon conversation antes pa man natabo ang krimen.
