Ginpahanugutan na sang probinsya sang Negros Occidental ang request sang nga airline companies nga dugangan ang ginapatigayon nga flights sang kada semana.
Suno kay Negros Occidental Provincial Administrator Atty Rayfrando Diaz, preparado na ang probinsya inkaso nga magpanaog na sa Alert Level 1 ang COVID-19 status sa Marso 1.
Ini bangod ginakabig na sang Department of Health (DOH) nga low risk ang kalabanan sa mga local government units (LGU) sa Pungsod magluwas nalang sa pila nga mataas pa ang risk level santo sa assessment sang DOH.
Maayo naman nga butang para sa mga Negrosanon kun manaog na ang probinsya sa Alert Level 1 bangod mas mangin mahalog pa ang pagginawi sang mga pumuluyo.
Dako ini nga butang suno kay Diaz ilabi na nga masobra duha ka tuig man nga hugot ang ristriksyon bangod sa COVID-19 pandemic kag madamo sang naapektuhan kaangay sang edukasyon.
Ginapakamaayo nga madasig naman ang pagnubo sang COVID-19 cases sa probinsya kun sa diin 32 nalang ang nabilin nga naka-admit nga COVID-patient sa Cadiz City District Hospital nga lunsay may moderate symptoms.
Ini ang dako naman nga pagnubo kun ipaanggid sang nakaligad nga bulan kun sa diin nagdangat sa 125 ang naadmit nga positibo sa virus.
Ang aktibo nga kaso sang COVID-19 sa Negros Occidental kahapon ang yara nalang sa 574 kun ipaanggid sa nakaligad semana nga nagadangat sa tres mil.
Sa pihak nga bahin, gin-aprubahan na ang hingyo sang mga airline companies nga dugangan ang ila nga mga flights apang ini ang by principle palang.
Suno kay Diaz, hulaton nalang ang pagpagwa sang panibag-o nga Executive Order (EO) ni Governor Eugenio Jose “Bong” Lacson, agud maimplementar na ang pagdugang sang byahe.
Ang Philippine Airlines ang nahibaluan nga nagahingyo sang tatlo ka flights sa isa ka semana sa flight nga Manila-Bacolod kag tatlo ka flight sa Cebu-Bacolod samtang ang Cebu Pacific naman ang nagaduso sang tatlo ka flights sa kada semana sa Manila-Bacolod samtang apat naman ka flights sa Cebu-Bacolod.
