Gin-athag sang pinuno sang Committee on Returning Residents sa syudad sang Bacolod nga wala sang nagbag-o sa requirements sang mga residente nga magapauli halin sa Manila ukon bisan diin nga bahin sang pungsod nga padulong sa syudad sang Bacolod.
Sa interview sang Bombo Radyo Bacolod kay City Councilor Cindy Rojas, wala sang naglain sa requirements sang returning residents sa syudad sang Bacolod.
Ang mga returning residents ang kinahanglan nga magsecure sang medical certificate nagikan sa Local Government Unit nga ginhalinan, ID nga nagapakita nga residente sang Bacolod kun wala mapakuha sang pamilya nila sa Barangay nga paulian nila sa syudad sang certificate of residency, travel authority kag sa tion nga makompleto ang requirements hatagan sila sang notice of coordination.
Pag-abot sang mga returning residents sa syudad, sugaton sila kag dal-on sa quarantine facilities kag iswab test sa sulod sang tatlo tubtob lima ka adlaw humalin sa pag-abot.
Sa tion nga mag-abot ang resulta kag negatibo, makapauli na kag ipadayon ang quarantine period sa tagsa ka panimalay apang ang nagpositibo ang mapabilin sa quarantine facility.
Suno pa diri, masako man ang quarantine facility sang syudad bangud nagbukas na ang Cebu-Bacolod flight.
Nagpanugyan man si Rojas sa mga mapauli sa syudad nagikan sa Manila ukon bisan diin man nga bahin sang pungsod nga kun mahimo isa ka semana antes ang pagpauli tapuson na ang requirements agud mahatagan sang notice of coordination agud nga indi na madelay pa ang ila pagpauli kag indi man sila kadali-dali isyu sini.
