Wala sa gihapon sang final nga rerouting plan ang Bacolod Traffic Authority Office para sa Masskara Festival.
Sa interview sang Bombo Radyo kay Police Major Junji Liba, pinuno sang BTAO, halos kada semana may yara sang pagbag-o sa activities sang Yuhum Foundation, amo nga wala pa sang final nga route plan ang BTAO.
Suno diri, kun maplastar na ang plano, ipasaka pa ini sa Sangguniang Panlungsod agud mahatagan sang resolusyon.
Nalakip sa maapektuhan amo ang Lacson Street kag downtown area nga patigayunan sang Sreet Dance competition, kun sa diin plano nga isira ang dalan-Lacson sa Oktubre 19 tubtob 22.
Plano nga maga-umpisa sa SM Mall ang street dance competition, kag maga-agi sa dalan sang San Juan, Gonzaga, Gatuslao, Araneta kag amo nga magapadulong na sa Paglaum Stadium.
10 ka modernized jeepney kag pito ka traditional jeepney ang maapektuhan sang plano nga ruta para sa Sreet Dance competition.
Pahayag ni Liba, bulan pa lamang sang Agosto ginpreparahan na sini ang rerouting plan apang iya lamang ginbasehan ang activties sang nakaligad nga tuig, kag sa karun suno kay Liba, wala pa gid sang final rerouting plan para sa Masskara Festival 2023 bangod sa pabag-o bag-o nga plano sang Yuhum Foundation sa lakat sang activities.
