Natumbahan sang puno sang kahoy ang rescue vehicle sang Bago City Disaster Risk Reduction and Management Office nga magarescue kuntani sang natumbahan sang kahoy sa Brgy Caridad, Bago City.
Sa interview sang Bombo Radyo Bacolod kay Dr Merijene Ortizo, head sang Bago CDRRMO, ang rescue vehicle nga may sakay nga nurses kag pila ka mga rescue personnel ang may irescue kuntani nga natumbahan sang puno.
Yara lamang sa 20 km per hour ang dalagan sang rescue vehicle bangod mabaskog ang hangin dala sang Bagyo TINO.
Apang bangod sa makusog nga hangin, nalukat ang puno sang acacia kag ini ang natumba sa ila nga dereksyon.
Naigo ang kilid nga bahin sang salakyan nga nagbuka sang ila nga windshield.
Ginapakamaayo na lamang ni Ortizo nga sila ang ginsalbar sang Ginoo kag wala sang nasamaran.
Apang bangod sa aksidente, sila ang ginsecure na lamang anay, samtang ang isa pa ka rescue vehicle nga padulong kuntani sa Brgy Ma-ao amo na lamang ang nagresponder.
Wala pa sa karun matumod kun kumusta ang medical condition sang biktima nga natumbahan sang kahoy gikan sa Brgy Caridad, Bago City.
