Naggwa naman ang mga resellers kag buyers nagikan sa Luzon agud ipanawagan sa supplier nga si Zaila Marie Dalida sang Barangay Bata, ciudad sang Bacolod nga ibalik ang ila kwarta bangud wala nadeliver ang items ang ila gin-order.
Sa interview sang Bombo Radyo kay Alyas Apple nagikan sa Caloocan, P50,000 ang kabug-usan niya nga napadala kay Dalida apang wala sang nadeliver nga items.
Indi naman macontact subong suno kay Apple ang ginaagyan nila nga supplier nga si Mariella nga amo ang direkta nga nagakuha kay Dalida.
Suno kay Apple, masami lang nagarason sang tinalikdan si Mariella nga delayed ang shipment kag sila ang nagapati diri bangud may yara sang shipping tracking number nga ginapadala.
Subong nga semana, nakibot na lamang sanday Apple nga indi na macontact si Mariella kag nagguluwa naman ang mga isyu batok kay Dalida nga madamo ini sang gintunto.
May mga resellers man si Dalida nga akig kanday Apple bangud loyal ang mga ini sa ginareklamo matapos ginhatagan sang libre nga sapatos, apang nagapakitluoy naman subong nga ibalik ni Zaila ang ila kwarta.
Kun nagapamati man si Dalida, nagpanawagan sanday Apple nga kuntani ibalik sini ang ila nga kwarta bangud makaluluoy ang iban nga biktima, ilabi na ang mga menor de edad.
