Ihuwad kuntani sang personnel sang IPM ang kaserola sang nakita sang mga ini ang lapsag, sa basurahan sa Barangay Punta Taytay, Bacolod City kahapon.
Sa interview sang Bombo Radyo Bacolod kay Barangay Kagawad Merilyn Malan, sang hana na nga ihuwad sang nagakuha sang basura ang kaserola nakita sini ang lapsag gani iya gilayon ginpahibalo sa Barangay.
Suno kay Malan, full term na ang bata, may inunlan kag nagaangot pa ang umbilical cord.
Gintsekyar man sang in-charge sa Barangay Health Center ang tanan nga nagabusong sa Barangay Punta Taytay agud ma-trace kun sin-o ang nagbilin sang lapsag.
Samtang, nagapati naman ni Beltran Salgado, residente sang Barangay Punta Taytay, nga indi residente sa lugar ang nagbilin sang lapsag bangud nagapati ini nga indi mahimo sang residente ang amo nga butang bangod sila ang mahapos nga matumod.
Suno kay Salgado ang nagbilin sang lapsag ang isa ka ginikanan nga indi luyag magsabat sang ila responsibilidad.
Gilayon man nga nakaresponder ang mga katapo sang Bacolod City Police Station 9.
Sa interview sang Bombo Radyo Bacolod kay Police Captain Andy Ofalia, station commander sang Bacolod Police Station 9, nabaton nila ang report mga alas 3:00 kahapon sang hapon kag gilayon.
Suno diri, ang lapsag ang ginkuha na sang punerarya kag ang Barangay Punta Taytay na ang maga-asikaso sa pagpalubong.
