Ginkumpirmar sang alkalde sang ciudad sang Bago nga isa ka babayi nga residente sang Brgy. Taloc, Bago City ang nagtaliwan sang Agosto 16 bangud sa coronavirus disease.
Sa interview sang Bombo Radyo kay Mayor Nicholas Yulo, ginpahayag sini nga gin-admit sa ospital ang pasyente sang Agosto 11 bangud sa nagpositibo ini sa balaitan kag nagtaliwan sang Dominggo nga adlaw.
Suno sa iya, nagasuprer ini sang diabetes rason kun ngaa nangin mabudlay ang pagbulong diri.
Nahibaluan nga ang bana sa pasyente nga nagaubra sa isa ka BPO company sa Bacolod City ang nagasuprer na sang sintomas sang COVID-19 kaangay sang hilanat kag ubo sang Hulyo 27.
Suno sa alkalde, apisar nga nagself quarantine ini, ginadul-ong siya gihapon sang pagkaon sang pasyente rason kun ngaa posible nga nalatnan man ang asawa.
Suno sa iya, ini na ang ikaduha nga fatality sa Bago City kun sa diin nagnegatibo na sa balatian ang una nga fatality antes ini napatay apang santo sa Department of Health, gindeklarar ini sa covid death.
Nagpanawagan ini sa mga pumuluyo ilabi na sa mga residente sang Brgy. Taloc nga pangamuyuan ang kalag sang nagtaliwan subong man ang pamilya sini.
Nagpahanumdum man ini sa mga residente sang Bago City nga magsunod sa health protocols, magkooperar sa gobyerno, kag indi nalang anay maglagaw kun wala man sang importante nga kadtuan.
