Desidido nga magpasaka sang kaso ang residente sang Barangay 7, Bacolod City nga ginlampusan sang tubo sang Barangay Kagawad.
Sa interview sang Bombo Radyo Bacolod kay Paolo Jarobel, 37-anyos, samtang nagalabay ini sakay sa motorsiklo malapit sa puluy-an ni suspended Barangay Kagawad Bernabe Sibug sang nagpauli siya matapos maghampang sang basketball kaupod ang iya nga amigo.
Hinali lang siya nga ginsinggitan sang suspended Barangay Kagawad nga “Maano ka, isog kagid haw? hapos ka lang patyon” kag nakasabat man ini nga “Maano ka man haw?.”
Nagwa man ang asawa sang suspended Barangay Kagawad nga si suspended Punong Barangay Hersy Sibug agud nga magpangayo sang pasaylo.
Nagpangayo man ini sang pasensya sa suspended Punong Barangay apang nakibot lamang ini nga naggwa ang suspended Kagawad nga may dala nga tubo kag siya ang hinali nga ginlampusan.
Ginapakamaayo sini nga yara ang iya pakaisa kag ginkuha ang tubo sa suspended Kagawad.
Nakaagom man ini sang pilas sa nawong.
Ginpablotter man sini sa kapulisan ang natabo kag nakahanda nga magpasaka sang kaso batok sa suspended kagawad.
Ang natabo nga pagpanglampus ni suspended Kagawad Sibug ang nakuhaan sang CCTV footage.
Nagpanugyan man ini kay Sibug nga indi na kuntani masulit ang ginhimo.
Nagapati naman si Jarobel nga hubog si Sibug kag nagapainit bangud na suspende sang tatlo ka bulan upod ang asawa nga kapitan.
Dugang pa sini, nga kaangay kay Sibug, siya ang pamilyado man kag may bata nga nagakinahanglan sa iya.
