Ginkumpirmar sang alkalde sang banwa sang Cauayan nga nakaistoryahanay na ang pamilya sang residente nga nag-inquire sa Municipal Health Office kag ang medical frontliner nga nagsabat diri kag nagdiskriminar sa mga taga-Bacolod.
Madumduman nga sa screenshot sang chat conversation nga ginpost sang nasambit nga residente, nag-inquire ini kun diin sarang makakuha sang pass bangud nagaubra ini sa Bacolod apang nagapauli isa ukon duha ka beses kada bulan sa Cauayan bangud yara didto ang iya mga kabataan.
Ginsabat ini sang admin sang Facebook page sang Municipal Health Office nga siya ang nagabitbit sang kagaw nagikan sa Bacolod nga sa karun hotspot sang COVID rasun kun ngaa ginpaidalum sa MECQ.
Daw kaangay nga gin-akigan man sini ang residente bangud nagabalik-balik ini sa ciudad.
Nakaangkon sang madamo nga negatibo nga reaksyon kag komento ang screenshot kag madamo nga mga netizens ang nagpahayag nga tuman ka unprofessional ang nasambit nga empleyado.
Sa interview sang Bombo Radyo kay Mayor John Rey Tabujara, ginpahayag sini nga sang kaangay nga adlaw nga naglapta ang screenshot, gilayon sini nga ginpatawag ang mga empleyado sang MHO kag natumod ang frontliner nga nagsabat sa inquiry.
Ginkadtuan man sini ang pamilya sang residente kag ginmanduan ang nasambit nga empleyado nga magkadto sa pamilya sang natungdan kag ginhambalan nga mangayo sang pasensya.
Suno diri, nakaatubangay naman ang duha ka partida.
Wala man gilayon sang alkalde ginhatagan sang sanction nga suspension ang frontliner bangud luyag man niya nga mabatian ang side sini gani iya pa ginahulat ang investigation report nagikan sa HR subong man ang report sang nasambit nga empleyado bangud asta subong wala pa ini nakapasa.
Nagpangayo man ini sang pasaylo sa mga pumuluyo ilabi na sa mga taga-Bacolod bangud indi man sini makontrolar ang giho sang iban nga tawo apang ang importante, suno sa alakde, iya ini gilayon nga ginhimuan tikang.
Nagpahanumdom man ini nga magsunod sa mga health protocols agud malikawan ang paglapta sang coronavirus.
