Nagreklamo ang isa ka residente sang Purok Fatima 1, Barangay Pahanocoy, ciudad sang Bacolod batok sa yab-ok kag higko nga nagikan sa mga truck sang IPM Construction and Development Corporation nga nagagarahe sa tabok sang ila nga balay.
Suno sa tagreklamo nga nagpahinago lamang kay Jeffrey, nag-arikison ang panit sini bangud sa yab-ok kag higko nga nagikan sa mga truck sang IPM.
Suno diri, oras-oras sila nagapaninlo sa sulod sang balay apang liwat na naman nga nagahigko.
Ang balay ni Jeffrey ang 50 metros lang nagikan sa garahe sang mga truck gani nagagutok ang mga truck sini sa dalan kun magdungan gwa nga kabangdanan sang iya nga pagkahangawa bangud delikado ini.
Nagainubo man ang tatlo niya ka kabataan kag iloy nga senior citizen.
Ang IPM ang nag-arkila sang garahe sa lugar sang Pebrero tuig 2022 kag naextend tubtub subong nga bulan.
Naguba man ang ila kanal bangud nalapakan sang truck apang tubtub subong, wala gihapon naislan.
