Isa ka resolusyon ang ginpasar sa session sang Sangguniang Panlungsod sang Bacolod kahapon nga nagahingyo sa alkalde sang ciudad nga mangita sang lote nga pahamtangan sang bag-o nga sementeryo sang ciudad.
Suno kay City Councilor Thaddy Sayson, chairman sang committee on finance and appropriations sa Sangguniang Panlungsod nga amo ang nagduso sang resolusyon, wala na sang bag-o nga lubong sa Burgos Cemetery halin sang tinalikdan nga tuig bangud puno na gid ang patyo.
Sa karon, ang Handumanan kag Granada Cemetery nalang ang nabilin apang indi na magpasugot ang barangay officials sang Barangay Granada nga ilubong sa nasambit nga sementeryo ang indi taga-Granada.
Bangud sini, ang Handumanan Cemetery nalang ang malubngan bangud ang Sum-ag Cemetery ang indi public cemetery sang ciudad kundi isa ka Catholic cemetery.
Suno kay Sayson, kinahanglan nga mangita na si City Mayor Alfredo Benitez sang lote nga butangan sang bag-o nga sementeryo samtang temprano pa.
Isa sa ginapropose sang konsehal nga ipahamtang ang bag-o nga sementeryo sa norte nga bahin sang Bacolod.
