Gin-aprubahan sa session sang Sangguniang Panlungsod sa Bacolod ang resolusyon nga nagapa-iway sang pagbukas sang klase sa Agosto 24 sini nga tuig.
Ini ang kasunod sang pahayag ni Education Secretary Leonor Briones nga magabukas ang klase sa nasambit nga petsa.
Sa interview sang Bombo Radyo Bacolod kay Councilor Renecito Novero, chairman sang committee on education sa SP kag author sang resolusyon, ginpahayag sini nga ila ginaduso nga ipaiway anay ang pagbukas sang klase bangud nagasaka pa ang numero sang mga kumpirmado nga kaso sang coronavirus disease 2019 sa pungsod kada adlaw.
Magluwas diri, nakasaad man sa resolusyon nga kun magbalik na ang klase sa tion nga makontrol kag magsubside na ang kaso sang COVID-19, likawan anay ang tradisyunal nga face-to-face interaction sang mga manunudlo kag mga estudyante.
Kun mahimo suno kay Novero, alternative learning mode lang anay ang gamiton.
Ginpaathag man sini nga indi dapat mabutang sa alang-alang ang ikaayong lawas sang mga estudyante kag mga manunudlo.
Suno sa konsehal, sa pagsugod tuhaw sang coronavirus sa pungsod gilayon nga ginpauntat ang klase agud nga malikawan nga maglapta ang balatian.
Gani nagapati ini nga dako pa ang risgo kun magresume ang klase sa bulan sang Agosto bangud padayon nga nagasaka ang COVID-19 cases sa pungsod.
Nahibaluan nga ang aprubado nga resolusyon ang gin-address man kay Presidente Rodrigo Duterte, Briones, kag iban pa nga mga opisyales.
