Gin-aprubahan unanimously sa Sangguniang Panlungsod ang resolusyon nga ginduso ni Councilor Celia Flor sa 46th regular session nga hugot nga nagakondenar sa anuman nga statement, akto ukon Public expression nga naga-normalize sang rape.
Ini matapos nga makapila ka beses nga pagpamangkot sang isa ka radio news anchor sang isa ka radio station sa Bacolod City sa isa ka babayi nga field reporter kun mahimo niya ini nga mahimuslan ukon ma-rape samtang naga-report ini sa kaso sang isa ka bata nga babayi nga ginhampak sang amay sa Bacolod Public Plaza nga isa man ka kaso sang pagpang-abuso sa kabataan kag kababainhan.
Suno sa statement sang konsehal, ginakondenar sini ang ano man nga pahayag nga naga-normalize sang rape, pagpang-abuso sa mga kababainhan, kag iban pa nga gender based sexual harassment sa bisan ano pa nga konteksto ukon intensyon sini.
Ang kaangay nga bastos nga pahayag ang wala sang lugar sa pampubliko nga diskurso.
Ang Bacolod City ang may yara sang Bawal Bastos Ordinance ukon pagpatuman sang Safe Spaces Act ukon RA 11313.
Kahapon, naaprubahan unanimously ang resolusyon nga ginhingagaw pasulod ni Councilor Flor kag pila sa nagco-sponsor diri sanday Councilor Jason Villarosa kag Councilor Atty Ceasar Distrito.
