Personal nga gindul-ong ni Bacolod City Vice Mayor El Cid Familiaran sa House of Representative kag Senado ang resolusyon nga nagapanawagan sa pagpadasig sa paghimo sang layi nga magasabat sa problema sang drivers kag operators nga madulaan sang palangabuhian bangod sa public utility vehicle (PUV) modernization program.
Pahayag sang bise alkalde, ang Resolution No. 371 series of 2024 ang unanimously approved sang Sangguniang Panlungsod kun sa diin sila ang nagahingyo nga padasigon ang paghimo sang layi nga magahatag sulosyon sa problema sang transport industry.
Paathag sini nga kadam-an sa mga unconsolidated traditional jeepney drivers ang wala man nagapamatok sa PUV modernization apang indi lamang luyag nga magpaconsolidate kag luyag nga makaangkon sang individual franchise.
Suno kay Familiaran, may mga local companies man nga naga-offer sa paghimo sang mga jeepney units nga nakacomply sa requirement sang PUV Modernization Program nga mas barato sangsa imported modernized jeepneys.
Panawagan sang mga ini nga tun-an ang memorandum bangod ginatos ka libo ang mahimo magutman.
Suno kay Familiaran sila ang nakabatun na sang duha ka complaints, kun sa diin wala ginahatagan participation ang mga operators, wala sang dividends kag wala man sang may napakita nga financial statement sa sulod sang duha ka tuig.
