Ginkumpirmar ni Negros Occidental Governor Eugenio Jose “Bong” Lacson nga indi na pag-ipatuman sang probinsya ang Resolution 125 sang National Inter-Agency Task Force nga nagapahanugot sa mga naga-edad lima ka tuig pataas nga maggwa sa ila mga puluy-an sa mga lugar nga napaidalum sa general community quarantine (GCQ) kag modified general community quarantine (MGCQ).
Madumduman nga ginpahanugutan na kuntani ang mga kabataan nga makagwa sa puluy-an kun sila ang nagaistar sa mga lugar nga yara sa GCQ kag MGCQ.
Suno kay Lacson, ila pa ginakonsiderar sang tinalikdan nga ini ang ipatuman sa probinsya apang bangud sa nagalapta nga bag-o nga variant sang coronavirus sa probinsya, ang Delta variant, gindesisyunan nga indi nalang ini pag-ipatuman.
Suno sa gobernador, bangud sa kahangawa sa Delta variant, indi pagsundon sang Negros ang IATF Resolution 125 kag magapabilin ang mga menor-de-edad nga indi sarang nga makagwa sa ila mga puluy-an.
