Liwat na naman nga magaconvene si Bacolod City Mayor Greg Gasataya upod ang tanan nga konsehal para maesturyahan ang resolution nga iterminate ang Joint Venture Agreement sa tunga sang Bacolod City Water District (BACIWA) kag PrimeWater
Sa interview sang Bombo Radyo Bacolod kay Councilor Wilson Jun Gamboa convenor sang Amlig Tubig, kapin 900 ang nareport nga leak sa water pipe sa idalom sang PrimeWater nga tubtob sa karun wala na-address.
Suno diri, kapin 45 percent ang leak sa ciudad nga nagakahulugan nga halos tunga gid sang tubig ang ginabayaran nga indi man makonsumo bangod non revenue water ini.
Dugang pa sini, kun may buslot ang pipe, ang tubig nga ginasupply sa kada panimalay mahimo kontaminado nga maka-apekto sa water quality kag public health.
Ginakasubo pa gid sini nga ginapanugyanan ang tanan nga magkinot kag nagapenetensya ang mga tawo sa tig-ilinit nga dapat indi pag-ihaboy sa mga konsumedor ang ini nga problema kay dapat ginhatagan ini sang solusyon sang korporasyon kag water district.
Suno kay Gamboa, pila na ka beses nga nagpasalig ang BACIWA-PrimeWater apang pila ka tuig na ang naglabay kag wala man sa gihapon sang progress.
Pahayag sini, nagpasa na ini sang tinalikdan nga semana sang resolution nga iterminate ang kontrata sang BACIWA-PrimeWater kag nakasugilanon sini si Mayor Greg Gasataya nga nagpasalig nga sa masunod nga semana tiponon sini ang tanan nga konsehal para sturyahan kun ano ang mahimo nga tikang.
