Gin-aprubahan na sang Sangguniang Panglungsod sang Bacolod City ang ginapangayo nga Resolution Of No Objection ukon RONO sang Bacolod Real Estate Development Corp. (BREDCO) agud maka-reclaim sang dugang nga 25 hectares para sa re-engineering kag rehabilitation.
Sa interview sang Bombo Radyo Bacolod kay Bacolod City Councilor Al Victor Espino, ginhatag sang SP ang RONO nga ginapangayo sang BREDCO apang maka-reclaim lamang ini sa premises sang ila port kag indi sini mahimo nga tandugon ang bahin sang ALMANA Property and Development Corp. (APDC).
Suno diri, maka-reclaim ang BREDCO sa north nga area sang ila puerto ukon ang ginatawag nga Roll on Roll Off port.
Dugang pa sini, may yara sang supporting documents ang APDC kag agreement nga nagapakita nga ginhatag ang property right sa ALMANA sa pagbakal sini sang area kag amo nga ginagamit nga dokumento sa pagpamatok sa RONO.
Opinyon ni Espino, mas maayo nga magfile sang kaso sa korte agud mahatagan sang legal nga interpretasyon ang gina-claim sang duha ka bahin.
