Gin-athag sang Chairman sa Committee on Housing and Urban Development sa Sangguniang Panlungsod sang Bacolod ang “colatilla” nga ginplastar antes ginpahanugutan ang Resolution Of No Objection (RONO) sa 25 hectares nga reclamation project sang Bacolod Real Estate Development Corp. (BREDCO).
Sa interview sang Bombo Radyo Bacolod kay Councilor Vladimir Gonzales, liwat nila nga ginpatpat ang request para sa RONO sa session sang SP kahapon kun sa diin ila man nga ginkonsiderar ang posisyon sang ALMANA Property and Development Corp. (APDC).
Paathag sang konsehal nga nakasugtan nga ihatag ang RONO sa baylo ang BREDCO ang mahimo lang makapatigayon sang reclamation project atubang sa Guimaras Strait.
Suno kay Gonzales, wala ginapahanugutan nga makareclaim sang duta agud himuon nga berthing ukon docking area ang eastern side sang puerto ukon sa atubang sang Bay Walk nga ginapanag-iyahan sang APDC.
Pahayag sini nga indi man nila luyag nga mahalitan ang mga plano sang APDC sa masunod para sa development sang ila propedad.
Gindumdom man sini ang panindugan ni Bacolod City Mayor Alfredo “Albee” Benitez nga malapad man ang kadagatan gani wala sang rasun agud awayan kag kun luyag sang mga ini sang reclamation, sarang pa nila ini himuon padulong sa isla sang Panay.
Dugang pa sini nga antes mag-umpisa sa proyekto kinahanglan man nga magpasa sang BREDCO sang technical survey sang Sangguniang Panlungsod agud sila ang makahatag sang approval.
Suno sa konsehal, dapat makasunod sa minimum standard nga 1.5 meters elevation ang ireclaim nga duta santo sa gina-impose sang gobyerno agud malikawan ang problema sa pagbaha.
Dugang pa ni Gonzales nga kinahanglan liwat nga magkuha sang permit sa Philippine Reclamation Authority antes patigayunon ang 25 hectares reclamation project bangod ini ang separado na sa nauna nga 250 hectares reclamation sadto.
Ginapakamaayo sang konsehal nga naaprubahan ang RONO nga wala sang may nagasampok nga interes sang nagkalainlain nga entities.
