Nag-untat na sa pagpatigayon sang expansion sang ginapanag-iyahan nga resort sa Barangay Banago, Bacolod City si Atty. Andres Tacolod.
Sa pagpaathag ni Atty. Reubin Mikael Sabig sang City Legal Office, ginserbe na nila ang Cease and Desist Order (CDO) apang wala ini ginpirmahan sang ginbatun sang hinablos ni Atty. Andres Tacolod nga si Franklin Tacolod, nga amo ang nagaserbe nga manager sa resort.
Apisar sina, nagapati si Sabig nga gina-acknowledge man sang mga ini ang CDO bangod nag-untat man sila sa operasyon.
Matapos mapadala ang CDO, ginbisitahan man sang lider sang enforcement team ang resort sang Biyernes sang gab-i kag personal nga nakita nga nag-untat na ang operasyon.
Magapatigayon naman kuntani sang pagsinapol sa City Legal Office sang Lunes kaupod si Franklin Tacolod apang wala ini madayun matapos nga nagsarado ang talatapan bangod pagpatigayon sang disinfection may kaangtanan sa COVID-19.
Wala naman nakahibalo si Sabig, kun nagpadayun pa sa operasyon sa mga sumunod nga adlaw si Tacolod bangod wala pa makareport ang ila enforcement natuhoy sa monitoring, apang kun kaisa nagabase man ang mga ini sa monitoring ni Punong Barangay Rodney Carmona sang Barangay Sum-Ag.
Ginapakamaayo naman ni Sabig nga natuman ang luyag nila nga pagpa-untat sang operasyon.
Dugang pa sini nga luyag man sang City Legal Office nga makasugilanon si Franklin Tacolod sa atubang sang Department of Environment and Natural Resources (DENR) agud nga matumod man kun tubtob sa diin ang bayolasyon.
Gin-isyu naman sang City Legal Office ang Cease and Desist Order agud nga mahatagan sang panahon nga matun-an ang reklamo, kag malantaw man kun may bayolasyon kag kakulang sang dokumento, agud nga ini ang matul-id.
Samtang ginpakigbahin naman ni Punong Barangay Rodney Carmona sang Barangay Sum-Ag nga magafile na ini sang kaso batok kay Atty. Andres Tacolod sa Biyernes.
Ini santo sa mga reklamo nga pagtambok sang Sum-Ag river kasubong man ang pagpangtapas sang mga mangrove trees sa Barangay Banago kag Barangay Sum-ag.
Pahayag ni Carmona nga masobra 300 ang mga napang-utod nga puno bangod naghuman ini sang dalan.
Ginserbe naman ang Cease and Desist Order (CDO) suno sa iya sang Miyerkules samtang wala ginpermahan ni Franklin Tacolod.
Dugang pa sini nga nagrequest man si Tacolod sa City Legal Office nga I-lift ang CDO.
