Lima ka mga criminal complaints ang pormal na nga ginpasaka sa Bacolod City Prosecutor’s Office batok kay Engr. Andres Tacolod nga nagtampok sang balas kag bato sa Sum-ag River.
Suno kay Atty. Mark Steven Mayo, legal counsel sang Barangay Sum-ag, Bacolod City, ang mga kaso nga ginfile batok kay Tacolod ang ginalakipan sang bayolasyon sa Revised Penal Code nga Grave Threat kag Direct Assault; violation sa Revised Forestry Code; Philippine Clean Water Act, Fisheries Code of the Philippines kag Water Code of the Philippines.
Ang ginfile nga mga special laws batok sa respondent ang may kaangtanan sa iligal nga pagpang-utod sang mga puno sang mangrove sa Barangay Pahanocoy kag Barangay Sum-ag subong man ang illegal reclamation activities sa Sum-ag River.
Suno kay Mayo, maganotify naman ang City Prosecutor’s Office sa respondent kag pagahatagan ini sang tyansa nga makafile sang counter affidavit.
Matapos sang pormal nga imbestigasyon sang piskal nga maga-uyat sang kaso, pagahulaton nalang ang resolusyon kun ipasaka sang piskal sa korte ang kaso ukon indi.
Samtang, ginpakigbahin man ni Mayo nga personal capacity, ukon naga-isahanon lang si Engr. Andres Tacolod nga ginpasakaan sang kaso.
Ang nagserbe nga complainant amo ang Barangay Council sang Barangay Sum-ag nga ginrepresentar nanday Punong Barangay Rodney Carmona kag Kagawad Dominador Bergaño.
Samtang, wala naman naghatag sang dugang pa nga komento ukon mensahe natuhoy kay Tacolod si Punong Barangay Rodney Carmona bangod pagahimuon nya nalang ini sa proper forum karun nga napasaka na ang mga kaso.
Ginapakamaayo naman ni Carmona nga napasaka na ang kaso kag nagalaom ini nga mapadangat ini sa korte sa sulod sang napulo ka adlaw.
Samtang, ginalantaw man sang punong barangay ang posibilidad nga may kaangtanan ang pagreclaim sang bulwangan sang Sum-ag River sa natabo nga pagbaha sa Barangay Sum-ag sang tinalikdan nga adlaw kasunod sang malawig nga pag-ulan.
