Ginalauman sang city administrator sang ciudad sang Bacolod nga subong nga adlaw magwa ang resulta sang surveillance testing nga ginpatigayon sa mga food delivery riders sang tinalikdan nga Sabado kag Domingo sa Bacolod Arts and Youth Sports Center.
Nahibaluan nga 548 ka mga riders ang nakigbahin sa test kun sa diin 81 ang nagtambong sang Sabado samtang 457 naman sang Domingo.
Sa interview sang Bombo Radyo kay City Administrator Em Ang, ginpahayag sini nga ila na ginpadala sa Cebu ang mga swab samples kahapon kag ginalauman sini nga magwa ang resulta subong nga adlaw.
Suno kay Ang, magapadayon ang surveillance testing sa ciudad kag ang mga traffic enforcers, Barangay Health Emergency Response Teams (BHERTs) kag public utility jeepney drivers naman ang masunod nga ipaidalum.
Suno sa iya, batch by batch ang pagahimuon nga test bangud ginalantaw sang ciudad ang resources, mga test kits kag availability sang isolation facilities.
Suno sa city administrator, ang pagpatigayon sang surveillance testing ang isa ka stratehiya agud mahibaluan kun may yara sang infection sa isa ka sektor; makontrol kag macontain ang virus; kag maisolate agud indi makapanglaton sa iban.
