Negatibo ang resulta sang DNA test nga ginpatigayon sa tatlo ka kalabera nga nasapwan sa Hacienda Garcia, Barangay Alangilan, Bacolod City kag kay Trisha Antiquera nga may tatlo ka namissing nga himata.
Madumduman nga duha ka kalansay ang natukiban sang mga tapasero sang tubo sang Enero 8 nga gina-alegar babayi kag lalaki, santo sa ila nga rib cage ukon gusok.
Una naman nga may narecover nga kalabera sa nasambitan nga kampo sang Nobyembre 2024.
Bangod sini, nagpakuha sang DNA sample si Trisha, agud mahibaluan kun ini ang iya live in partner nga si Jonel Nangan ukon iya iloy nga si Lorebelle Antiquera ukon live in partner sang iya iloy nga si Joem Villacoger nga gina-alegar gin-abduct sang Hulyo 2024.
Suno kay Bacolod City Police Office Director Police Col. Joeresty Coronica, wala nagmatch ang sample nga ginkuha kay Trisha kag sa mga kalabera.
Suno diri, kun may magkadto man nga maghambal nga may yara sila sang namissing nga himata, bukas sila nga magbulig.
Pahayag ni Coronica napahibalo na sang Bacolod Police Station 5 ang pamilya nga nagpaidalum sa DNA test angot sa resulta.
Ginkaakig ni Trisha Antiquera nga wala ginpalab-ot sa iya nga negatibo ang resulta sang DNA test.
Sa interview sang Bombo Radyo kay Trisha, naakig kag nakibot ini nga wala siya ginpahibalo nga negatibo ang resulta sa DNA test sa tatlo ka kalabera nga nasapwan sa Brgy Alangilan.
Suno diri, wala sang problema kun tani kun nadelay lang sang isa ka semana nga napahibalo sa iya kun may yara man sang ginprocess apang sobra-sobra na suno sa iya nga naglabay na ang duha ka semana apang wala gid sang may nagcontact sa iya.
Indi man sini mabaton nga negatibo ang resulta tubtob nga wala ini sang may makita nga pamatuod nga wala nagmatch ang sample.
Plano sini sa karun nga magpadulong sa Bacoldo City Police Office agud mangkuton kun ngaa ulihi na naglab-ot sa iya ang balita nga naggwa na ang resulta kag luyag man sini nga magpadulong sa Camp Crame agud makita sini mismo ang resulta sang DNA test.
