Resulta sang drug test sa masobra 400 nga personnel sang Negros Occidental Police Provincial Office, lunsay negatibo

Negatibo tanan ang resulta sang 414 ka mga personnel sang Negros Occidental Police Provincial Office (NOCPPO) nga na-assign sa Provincial Headquarters nga ginapaidalum sa drug test.

Sa interview sang Bombo Radyo Bacolod kay NOCPPO Spokesperson Police Captain Judesses Catalogo, sang Enero 7, ginpaidalum sa drug test ang masobra sa 100 ka mga personnel samtang sang Disyembre 9 may yara man sang masobra sa 300 ka mga personnel nga gin-test.

Suno diri, lunsay negatibo ang resulta sa paggamit sang Methamphetamine hydrochloride (Shabu), Marijuana, kag iban pa nga illicit substances.

Pahayag ni Catalogo, mandatory kag surprise drug test ang ginapatigayon agud masiguro ang integridad sang kapulisan sa kampanya batok sa illegal nga druga.