Ginahulat pa sang kampo ni San Carlos City Mayor Renato Gustilo ang resulta sang imbestigasyon sang National Bureau of Investigation angot sa paggamit sang iya pangalan kag perma sa dokumento sang tatlo ka unscrupulous contractors nga ginpadala sa Department of Public Works and Highways (DPWH) central office agud gamiton sa ila kaugalingon nga benepisyo.
Madumduman nga nagpadala sang sulat ang DPWH central office agud kumpirmahon ang tatlo ka flood control project sa ciudad.
Ang tatlo ka flood control project nga natumod amo ang proyekto sa Andoon river, Palampas river kag Jigalaman River.
Nagpahayag ang alkalde nga may yara sang existing nga proyekto kag natapos na apang natukiban nga may lain pa gid nga project title, lain pa gid nga contractor kag lain nga cost sang project apisar nga parehas lang ang natumod nga project location.
Sa interview sang Bombo Radyo Bacolod kay Joe Ricalex Alingasa Jr., tagpamaba ni Mayor Renato Gustilo, may yara sang nabaton nga sulat ang DPWF- Negros Island Region halin sa NBI nga nagapangayo sang kopya sang dokumento nga nabaton sang alkalde angot sa tatlo ka unscrupulous contractors.
Suno diri, luyag lamang ni Mayor Gustilo nga malimpyphan ang iya pangalan kag mahibaluan kun sin-o ang dapat nga kasohan.
Pahayag ni Alingasa, luyag sang alkalde mahibaluan kun paano nakuha sa mga contractor ang iya pangalan, perma kag kun paano nila nahibaluan ang ila proyekto apisar nga ang ini nga mga contractor gikan sa Northern Luzon.
