Duha ka bulan pa ang hulaton antes maggwa ang resulta sang medico legal kun nahimuslan ang 38 anyos nga iloy nga nasapwan nga patay kag wala na sang pang-idalom nga panapton sang Mayo 21 sa Prk Kapayas, Brgy Sicaba, Cadiz City.
Sa interview sang Bombo Radyo Bacolod kay Police Lt Daleen Grace Loreno, deputy chief of Police sang Cadiz City Police Station, naggwa na ang resulta sang post mortem examination sa bangkay ni Jenny Ann Delano.
Ang rasun amo ang blunt force trauma sa ulo, nga ginalantaw tuga sang paglampos sang bunga sang lubi; kag ashpyxia by strangulatoon, ukon ang pagkuga diri gamit ang strap sang iya sling bag.
Suno kay Loreno, duha ka bulan pa magwa ang resulta sang medico legal agud matumod kun ini ang nahimuslan.
Apang pahayag sang medico legal experts, sa ila nga inisyal nga pagtsekyar, wala sang nakita nga fresh wound gani mahimo nga ini ang wala matandog, apang pagahulaton gihapon ang resulta sang test agud makasigurado.
May-ara naman sila apat ka witnesses kalakip na ang bana, nga amo man ang complainant.
Suno kay Loreno, positibo man nga gintudlo sang ulihi nga witness ang ila nga person of interest nga may kahimuan sang krimen.
Ipaidalom pa sa evaluation sang prosecutor ang sworn statement sang mga witnesses, kag ginahulat paman ang resulta sang imbestigasyon sang Scene of the Crime Operation (SOCO) nga gamiton sa pagpasaka sang kaso.
