Ginahulat pa ang resulta sang paraffin test nga ginpatigayon sa lalaki nga gina-alegar na-igo sang stray bullet kag duha sini ka kaupdanan sa pag-inom sang alcohol sa Brgy Cabug, Bacolod City sang Disyembre 25.
Sa interview sang Bombo Radyo Bacolod kay Bacolod City Police Office spokesperson Police Captain Andro Maapni, ang resulta sang paraffin test ang ginalauman nga makahatag sang kasanagan ukon lead sa kaso.
Sa imbestigasyon, nahibaluan nga nag-inom ang tatlo pasado alas-10:00 sang gab-i sang Disyembre 24 samtang nagavideoke.
Alas-2:00 sang kaagahon sang Disyembre 25, nakabatyag ang biktima nga naga-init kag nagbiring ang iya paa kag sang gintsekyar didto na nakita nga ini ang puno sang dugo.
Gilayon nga gindala sa ospital ang biktima, kag madasig man nga nakagwa nangod menor lamang ang iya nga pilas.
Isa sa karun sa ginabaligban bangod wala sang nakita nga slugs kag basiyo sang bala sa lugar, samtang wala man sang nakita nga agi sang bala sa mga dingding sang balay.
Wala ginadula ang posibilidad nga bangod sa kahulugbon, may-ara sang nagpasayang-sayang sang armas-luthang sa tatlo kag aksidente nga napalupok nga nagresulta sa pagkasamad sang biktima.
Ginpalibot man ni Maapni ang lugar, apang wala gid sang nakita nga CCTV nga makabulig kuntani sa imbestigasyon.
