Ang resulta sang plebisito ang mangin basehan kun bala madayon ang joint venture agreement sang Central Negros Electric Cooperative kag More Power.
Sa interview sang Bombo Radyo kay CENECO General Manager Atty. Arnel Lapore, pirmado na ang JVA kag ginaendorso na sang Board of Directors sa member-consumers nga amo ang magaaapprove ukon magadisapprove sini.
Ang mga may bill nga active as of June 2, 2023 amo ang eligible nga magpasakop sa plebisito sa June 24 kag 25 kag July 1 kag 2 kun sa diin butangan sang check ang YES kun nagaapprove sa JVA samtang NO naman kun nagadisapprove.
Kun magdaog ang NO sa plebisito, ini ang respetuhon kag indi madayon ang joine venture agreement.
Kun magdaog naman ang YES, magasugod na ang proseso sa pag-apply sang prangkisa sang CENECO kag Primelectric Holdings sa ngalan na nga Negros Electric and Power Corporation sa Kongreso bangud kinahanglan ang bag-o nga prangkisa para diri.
Suno kay Lapore, ginpirmahan ang JVA bangud signed copy sini ang igapresentar sa member-consumers bangud amo ini ang official copy kag diri nakabutang man ang obligasyon kag kinamatarong sang duha ka partido.
Gin-ako ni Lapore nga nagapabor ini sa JVA bangud luyag niya nga mangin kabahin ang Primeholdings sa pagmodernize sang mga equipment sang CENECO kag pagpanami sang serbisyo sa mga konsumidor.
Ang Primelectric Holdings ang sister company sang More Power nga nakasulod na sa ciudad sang Iloilo.
Ang Ignite Electric Company kuntani ang una nga ginlantaw nga mangin partner ni CENECO bangud ginabug-usan ini sang MERALCO kag More Power apang nagpaiway ang MERALCO kag Prime Holdings ang nagpursige.
