Ginahulat pa ang resulta sang post mortem examination sa kamatayon sang 11 anyos nga lalaki nga nasapwan nga nalubong sa balas sa Brgy. Tiling, banwa sang Cauayan, alas- 3:20 sang hapon kahapon.
Ang biktima ang isa ka grade 4 student kag residente sang nasambit nga lugar.
Sa interview kay PLt Col Norberto Barniso, hepe sang Cauayan Municipal Police Station, nakit-an sang pakaisa sang biktima nga nagahampang pa ang 11 anyos nga lalaki sa kilid sang baybay kag ginsaway nga untaton na ang pagkutkut sa balas bangod tuman na gid kadalom.
Suno diri, naglakat na man lang gilayon ang pakaisa sang biktima samtang may nakakita man nga nagpauli ang bata apang liwat ini nga nagbalik sa area.
Samtang ginapangita sang pamilya ang biktima, nakit-an ang tsinelas sang grade 4 student sa higad sang baybay kun diin ini ulihi nga nakita nga nagahampang.
Ginkutkut ang balas kag didto na nakit-an ang bangkay sang biktima.
Pahayag ni Barniso, padayon pa ang imbestigasyon sa pagkapatay sang bata apang nagpanugyan ini sa mga ginikanan nga bantayan ang mga bata nga nagahampang sa kilid sang baybay ilabi na kun nagakutkut kag nagapalubong-lubong sa balas.
