Ginahulat na lamang ang resulta sang post mortem examination sa bangkay sang 50 anyos nga nasapwan nga yara na sa advance stage of decomposition kag nasulod sa sako sa Sitio Luyang, Brgy. Oringao ciudad sang Kabankalan, sang Miyerkules.
Ginkilala ang biktima kay Jennifer Binggaan, 50 anyos, single kag residente sang nasambit nga lugar.
Sa interview sang Bombo Radyo kay Police Captain Sammy Gasataya, Deputy Chief of Police sang Kabankalan City Police Station, nasapwan ang bangkay ni Binggaan nga yara sa sulod sang sako kag ginbutang sa idalum sang katre sa balay nga ginatiniran sini.
Nahibaluan man nga ang balay nga ginatiniran sini ang indi iya kag ginpahanugotan lamang ini sang tag-iya sang duta nga siya ang maka-istar didto.
Nakita man nga nabali ang duha ka kamot ni Binggaan kag may yara sang pilas sa atubang kag likod nga bahin sang liog sini.
Suno kay Gasataya, masami nga mag-inom sang makahulubog nga ilimnon ang biktima kag ini ang magahod kun hubog.
