Resulta sang surprise drug test sa mga pulis, ginahulat pa sang NOPPO

Ginahulat pa sang Negros Occidental Police Provincial Office (NOPPO) ang resulta sang ginpatigayon nga random drug test sa mga personnel sini nagligad nga Lunes.

Suno kay NOPPO spokesperson Police Major Edison Garcia, bangud sang kadamuon sang ginpaidalom sa tests, indi madali ang pagpaguwa sang resulta sini.

Madumduman nga nagligad nga Lunes, 65 tubtob 100 ka mga pulis sa NOPPO ang ginpaidalom sa test kadungan sang flag raising ceremony sa headquarters.

Suno kay Garcia, kun sin-o man ang magpositibo sa drug test kag sa confirmatory test mapasakaan ini sang administrative case kag posible mangin tunaan sang iya pagkadula sa serbisyo bangud ang paglapas sa RA 9165 ukon Comprehensive Dangerous Drugs Act of 2002, ang isa ka grave offense.